لو كنت أمير

لو كنت أمير

من أمراء الحواديت

كنت ادى لكل فقير وفقيرة بيت

بيت بجنينة مليانة زهور

وبعشة مليانة كتاكيت

وأعلّق فوقه قمر بنور

ونجوم لولى... فتافيت فتافيت

لوكنت أمير

من أمراء الحواديت

كنت ادى لـ... وزرائى محاريت

علشان يشتغلوا بايديهم ويشوفوا ازاى

الأرض السمرا لما نحرتها كدة رايح جاى

بتطلع غلّة وبن وقطن وضل وشاى

وتطلع غاب نعمل منه الأرغول والناى

لو كنت أميرمن أمراء الحواديت

كنت أدّى لكل الأطفال الحلوين ألعاب

قطر بقضبان..فرشة ألوان.. مية أو زيت

وابنيلهم قصر على المالح من غير أبواب

قصر بقبة لولى وقبة مرجان

وأعلّق عالقبة أجراس فضة ومرمر ودهب ونحاسل

كن قبل ده كلّه لو كنت أميرمن أمراء الحواديت

كنت ادّى لكل الناس

وردة وكتاب

وردة وكتاب

وكمان قبل ده كلّه قبل ده كلّه

لو كنت أمير

من أمراء الحواديت

كنت أرفرف زى النسمة وادخل فى الحلق

وأقطّع نص السنة الخلق

نص اللى مابيقولش الحق

علشان يتعلمه

امتى يقولوا أيوة

وامتى لأ

ده لوكنت أمير

من أمراء الحواديت

القاهرة

هنا القاهرة الساحرة الآسِرة

الهادرة الساهرة الساترة

هنا القاهرة الزاهرة العاطرة

الشاعرة النيّرة الخيّرة الطاهرة

هنا القاهرة الساخرة القادرة

الصابرة المنذرة الثائرة الظافرة

صدى الهمس في الزحمة و الشوشرة

أسى الوحدة في اللمة و النتورة

هنا الحب و الكدب و المنظرة

نشا الغش في الوش و الإفترا

هنا القرش و الرش و القش و السمسرة

هنا الحب و الحق و الرحمة و المغفرة

و انا ف قلب دوامتك الدايرة بينا

بصرّخ بحبّك يا أجمل مدينة

يا ضحكة حزينة ..

يا طايشة و رزينة بحبّك

و اعفّر جبيني في ترابك

و اعيش في رحابِك

و أقف جنب بابك

جنايني أروي بالدم وردة شبابك

يا زينة جنينة حياتنا اللعينة

بحبّك يا بنت اللذين

بحبّك

من أنا

أولاً لست أنا من أتوسط شاعرنا العظيم وأديبنا الرائع بل هو صديق لي
علَلني أقف هذا الموقف قريباً

ثانياً لماذا هذه المدونة

لأنني عاشق جداً للشاعر سيد حجاب منذ أن تفتح وعيي من خلال أغاني المسلسلات الدرامية التي كنت أسمعها وكنت أكتب كلماتها وأستمتع بها بدون موسيقي حتي أنني أعتبر نفسي حجابي ( نسبة إلي حجاب ) الهوي

منذ فترة فى مدونة أخري لي كتبت تدوينة تحت عنوان باشحت سيد حجاب أطالب الأخوة بإمدادي بقصائد سيد حجاب ولم يفعلها المدونون ولكن فعلها هو أستاذي وأرسل لي عبر التعليقات قصيدة الأراجوز حينها لم أصدق وراسلته عبر الإيميل وظللت فترة أتواصل معه حتي أخبرني أنه كان بالأقصر وكان يود رؤيتي . أيقنت أنه الأستاذ وحادثنى عبر الهاتف وأستأذنت منه فى الخروج بالمدونة هذه لتكون أول مدونة شرعية عبر البلوجر أرجو أن تستمتعوا بهذه القامية السامقة فى شعر العامية المصرية .